Monday, January 01, 2007

مشهد 1

مشهد 1:


ليل خارجي ,شاب مصري ,بنطلون جينز ,جايكت اسود و جزمة رياضية , طالع سلم قذر في عمارة من 4 ادوار,يقابل علي السلم شابة من جنوب شرق أسيا ترتدي ملابس كاجوال و تحمل شنطة علي ظهرها ,يبص لها من تحت لتحت فا تبص لة نظرة ثابتة تكسفة, يوصل للدور الاخير ,يطلع مفتاحة من جيبة بتردد و يفتح باب شقة.

الكاميرا بتبص من ظهر البطل, صالة متربة ,عفش قليل متنتور علية اكوام من الهدوم و اطباق فيها بقايا أكل,يفتح باب اوضة النوم و يبتدي يقلع هدومة و يرميها باهمال علي الارض و العفش,الكاميرا تتجول في الشقة,اثاث متهالك ,دولاب فاضي علية كراتين كمبيوتر,حيطان جير عليها اثار مطرادات ليلية لناموس و اثر لضربة شبشب قتلت بورص في ليلة صيفية سابقة. ترجع الكاميرا علي البطل الي المفروض انة عريان,قبل ماتوصل لة يرمي بوكسر رصاصي فا تظلم الكاميرا

مشهد 2:

ليل داخلي,حمام الشقة,الكاميرا بتبص من عين البطل,يشغل الميا السخنة ,عينية تنزل علي البانيو,عنكبوت بالقرب من فتحة نزول الميا,رجلية تنزل و بعدين يدرك الوضع فا يبعد:

يلعن دين بوكم,بقالكم 15 سنة ما استحمتوش!

الكاميرا تلف,ايدية بتدور علي الشبشب,الكاميرا ترجع تاني علي العنكبوت,صوت الشبشب جاي من بعيد,تراك,الدنيا تظلم

مشهد 3:
اظلام تام,بصيص نور يدخل بالتدريج ,لقطة طويلة,الكاميرا في طرف الاوضة العامودي علي الباب ,سيلويت لشخص ضخم لابس جلابية,صوت اجش يقول

أنت احمد عبد الرحمن؟
يرد نفس الشخص الي كان في المشهدين الاولانين ,ها نميزةصوتة رغم انة متحشرج من اثر النوم
ايوة خير؟؟

انت نايم؟

لا, خير؟

يضاء النور,شاب مصري ضخم الجثة,حوالي 190 سم و 140 كجم,دقن نابتة من أسبوع ,جلابية زيتي مقلمة بالطول و شبشب بلاستيكي

انت الي جيت مكان احمد محرم الاسبوع الي فات,امال ما شفتكش كل دة لية؟

انت الي مواعيدك مش متظبطة معايا,انت محمود؟؟

ايوة

يجلس الي طرف السرير بدون أستئذان,و يبدأ في الحديث

يا اخي الواحد زهق من الشقة,الدش بايظ و الدي اس ال مقطوع من أسبوع ,انا لسة صاحي من النوم و الساعة لسة 12 بالليل و مش عارف اعمل اية لحد الصبح


ياة

يكمل محمود حديثة

انا عاوز أستقر بقي,بقالي 3 سنين في العيشة المؤقتة دي,عاوز اتجوز بقي و استقر

طيب مش لسة بدري شو...

يقاطعة محمود

دة منظر عفش ولا دة منظر بيت

يقف و يبدأ المشي في دوائر و الكلام بسرعة و عصبية

انا مش عارف احنا لية بندفع 900 جنية للست بنت الوسخة دي الشهر و كمان مش عاجبها و عاوزة تزود الايجار اول السنة 10%,علي فكرة السخان باظ,لما نصلحة ها تدفع معانا ,لسة سنتين عالتخرج ,ما بقتيش اطيق اقعد هنا بس أبويا بيبضن علي كل ما انزل البلد, امي عاوزة تجوزني او لما أتخرج


هو انت مش شايف انة مش صح انك تقول كل الكلام دة لحد انت لس...؟؟


بذمتك مش نفسك تتجوز بقي و تستقر كدة؟ترجع البيت تلاقي الشقة نضيفة و بتلمع و تلاقي مراتك مستحمية و مستنياك,تسخن لك الاكل و تقعد تدلعك,انا عاوز اتجوز مزة زي مروي,شفت الكليب الجديد بتاعها؟؟


يقول الجملة الأخيرة بينما تلمع عينية بنظرة طفولية فرحة مختلطة بشبق

هو انت ملكش جيش؟

لا ياعم انا ها اطلع نظر

يجلس مرة اخري الي طرف السرير

ما عندكشي أفلام حلوة عالكمبويتر؟؟؟

طيب استني اغسل وشي و أشوفلك

يخرج احمد من الحجرة و يتبعة محمود كطفل صغير
ــ قطع ــ

Posted by Mohamed Abd ALLAH at 12:21 AM



2 Comments

  1. Blogger sha3'af posted at 1/03/2007 10:35:00 PM  
    طبعا لا مجال حقيقي للتعليق ، لأن زي ما قلتم ، النص غير مكتمل بعد


    لكن أنا كاتبه بس أتعجب من أستاذ لون ولف ، لأنه قافل البلوجز بتاعه ، بعدين إذفجأتن يشترك في البلوج الجماعي ده

    طب ع الأقل يا سيدي اعمل حساب البلوجرز المبتدئين أمثال حالاتي اللي ما يعرفوش مين هوه لون ولف و لا عارفين كتابته عامله ازاي

    بجددد بجد بقيت بأستفز جدااا م المداونات اللي بتقفل دي ، خصوصا لو لأصحابها لينكات في معظم المداونات
  2. Blogger Aladdin posted at 1/06/2007 02:29:00 AM  
    الأخت شغف ... ليس هناك أي داعٍ "للاستفزاز" من غلق أي أحد لمدونته لأن هذا العمل ببساطة حرية شخصية لا تنفع أحداً ولا تضره!!

    وكون المدون "غير المبتدئ" لوون ولف قد اختار بمحض إرادته الحرة أن يعود للتدوين بشكل آخر (وهو الشكل الجماعي) فهذا أيضاً شأنه وحده ولا يضير أحداً أو "يستفزه" كما فعل بك!!

    في الحقيقة ما يريده أصحاب المدونة هذه أن تقولي رأيك في خانة التعليق فيما يختص بموضوع التدوينة، وأحسبهم في النهاية يشكرونك في آخر النهار على المرور والتعليق.

Post a Comment

« Home